Zwiegespräch zwischen dem Schalfraum (Renate Illek) und der Küche (Karl Lehmann)


K.: ja grüaß de Schlafraum - bist scho wach
S.: ja freilich bei dem grausigen Krach der von dir - von da Küch auffa kimmt bloß weil irgend so ein Gloife sei Frühstück einimmt
K.: ja freilich - um achte in da Früha i glab du host a Loch im Knia do werd im Gebirge der Schlafraum geräumt do werd nix mehr ummananda geträumt
S.: aber bei mir herobn do wárs no so sche es muaß doch net oiwei ois so wia Früher geh aber bei "Früher" kennan ma mir zwoa vei echt mitredn seit 80g Johr duads uns jetzt tatsächlich scho gebn
K.: wos - san des jetzt tatsächlich scho achtzg Johr des glabst ja net - ja is des wohr
S.: oiso bei mir - do werdns vielleicht bloß 78ge sei weil an mir geht so manche Nacht vorbei wos gsuffa habn - de Edelweißler - de ganze Nacht do war i gschont, des hot vei sche wos bracht
K.: nà - so kost des jetzt a net song erstens habn ses a vadrong und zwoatens habn sie net gsuffa ohne Grund sondern sich bergkammeradschaftlich ausgetauscht - und des is gsund
S.: so - und wos warn des dann für Silvesterfeiern wos um achte in da Früh an Feichteckhang naufsteuern a Zeit zum schlaffa duad se kam finden weils de ganze Nacht braucht habn, bis eanane drei Sternwerfer ozünden
K.: und den soidsama Punsch hab genossen den gsuffa habn - aus den Eimern den großen aber noch 80g Johr deafad ma echt moi rekapituliern
S.: wos duad in dene 80g Johr ois passiern oder schaung ma zruck moi weida no warum san mir heit überhaupts do
S.: ja weil 1910 sechs Münchner Gebirgler dean moana sie woin se bei da Tiroler Sektion Pfunds o loana denn sie woiden net de große Münchner Szene und de Pfundser warn derer bloß zehne
K.: vor allem deans do an saubern Rotwein griang und de Ösis dean a no koa Maut net kassiern drum warns 1919 scho 95 Mitglieder de am Gebirg habn a Freid und darunter - damals sensationell - sogor richtige Weiberleut
S.: aber 1923 san aus da Sektion Pfunds dann de Edelweißler geborn und de Schuha-bräualm is eana erste Hütten wordn aber wegen extremen jahrelangen Schneemangel - hört - hört de Oim dann schließlich aufgebn werd
K.: und unterm Vorstand Wismeyer - du - do habns im Längental gschaut habns 1937 dann auf Erbbaurecht unser Hütten baut da Zimmerermoasta duad rein zufällig da hiesige Burgermoasta sei und domois natürlich bei da richtigen Partei
S.: mit Schuldscheine habn de Mitglieder eanan Obulus brunga und wenns brennt hot, is de Familie Denk eigsprunga und dann kimmt da Glasl Sepp, der war scho a Hund bettelt de Bauern 1971 ob den Grund
K.: freilich dean de Edelweißler an Goidbeitl aussaziang aber da Glasl Sepp müassat dafür an Nobelpreis griang denn fünf Bauern unter oan Huat nei bringa do treibst du leichter hundert Fläh auf da Autobahn von Tölz auf Minga
S.: seitdem is de Sektion stolze Besitzerin von unserer Hütten im Längadoi drin und es desweng seit 80g Johr oiwei wieder vorkimmt dass irgend so ein Gloiffe um achte in da Früha scho sei Frühstück einimmt
K.: geh - Schlafraum - jetzt sei net so ekelhaft weils auf da Edelweißhütten hoit doch a wengal locker herlafft
S.: wos hoaßt do Edelweißhütten - so hoaß ma mir ja gornet host du no nia im Internet gschaugt - wos do drinna steht
K.: do steht ois mögliche - Längaberghütten - Längadoihütten des mächast ja net glabn wos ma mir für Nama habn
S.: ja und frogst bei da Mare drunten, wos de Nachbarn song de dean da no ganz andere Nama zudarong ganz früher habn ses Wismeyer-Hütten gnennt dann hot mas ois Hoizner-Matte-Hütten kennt
K.: dann wars auf oimoi de Kratzer-Hütten - mir san zu beneiden bloß zwischen oidn Kratzer und Junga deans net unterscheiden mit sovui Nama wia mia - duad koa andre Hütten rum roaßen denn offiziell den mir - Längenberg HsNr. 5 - ja hoaßen
S.: des is mir Wurst - mir duads bloß drum geh i ois Schlafraum bin wichtig - bei mir do is sche i hob schene Decken - so duad se des ghörn vor allem wenns richtig zammaglegt werdn
K.: ja wos is jetzt do so wichtig wos is foisch und wos is richtig zammaglegt is a Decken a Decken und hot bekanntlich genau vier Ecken
S.: du vastehts garnix - du host koa Ahnung hint und vorn wos san beim Decken-zammaleng scho für Fehler gmacht wordn wos obn oder unten is weiß keiner nicht und du host de Kashaxen von da vergangen Nacht im Gsicht
K.: aber do gabs ja jetzt scho Workshops hob i ghört wo ma lernt, wia a Alpernvereinsdecken richtig zamma glegt werd vorausgesetzt dass du den nötigen IQ dazua host weil de sonst da Hüttenwart koa Decken nimma zamma leng loßt
S.: ja und wos is erst mit de Kissen - do duad se a koana wos scheißen und duads einfach irgendwie auf de Matratzen schmeissen stell dir vor du gehst ins Bett und s`Kissen liegt verkehrt dort - des is fei net nett
K.: ja im Extremfall kunnt des wer schaffa dass er dann im Kopfstand muaß schlaffa weil des Kissen so vadraht dort flaggt dass des ein geschulter Hüttengeher überhaupts net dabaggt
S.: dafür hamma ja mir zwoa eine Eigenheit de hot koa Hütten, wos mi bsonders freit dieser Austausch von Geräuschen und Gerüche über die sensationelle Ofenklappe zwischen Schlafraum und Küche
K.: sche sogst du - ja bist du bläd wenn a Sauerkraut am Ofa steht und zwar seit drei Stund und koan Esser net griagt und der Gstank zu dir auffe ziagt
S.: du bist doch der Multi-taskin-allzweck-Raum Wohnzimmer, ois Schul-und Spielzimmer direkt ein Traum Konferenzsaal und wersd hauptsächlich ois Küch ogschaut do konns scho passiern, dass an Sockerl ins Sauerkraut einehaut
K.: ja und wos moanst wos i von dir do drobn für komische Gerüche und Geräusche muaß hobn do redn ma jetzt gornet von da Liebeskunst eher scho vom Fuaßkas-Dunst
S.: aber wenn hoit de Klappen offen steht a bisserl a Wärm zu mir rauf geht dass ma sche gmüatlich schlafen kann wenn net wieder de Decken foisch zammaglegt san
K.: na - am schenan is scho herunt und wenn ma do a bisserl zruckdenga kunnt frühers schluckans Zwetschgenwasser in Massen heit habns an Huastentee drin in da Tassen
S.: und statt ana Butterchremtorte fressens jetza Prostagut forte und bei mir aufn Ablagebrettl herobn ganz gwiß lieng koane Pariser mehr sondern de Bruin und s`Gebiss
K.: und de Hörgeräte - aber des is net schlecht denn wenn herunten wer an Krach macha mächt der ko sogor um achte in da Früha frühstücken - weils nix mehr hörn und könnan se hächstens no übern Gstank beschwern
S.: apropo Gstank - und a pro - Po jetzt hamma ja a nogelneues Klo a Bio-Klo - ja do kannst varecka do duad ma glei überhaupts nix schmecka
K.: a soichas war ja scho moi dortn - bloß des werd neamt mehr wissen do hot ma ganz einfach in a Kisten nei gschissen do war nix Bio des riacht ma genau des hot gstunga wie die Sau
S.: und entsorgt hot ma des ois im Boch der hinter der Hütten - der is domois no glaffa ganz gach bloß hot ma hoit vorher schnoi mit an Kübel s`Trinkwasser ausser - denn hernoch riachts etwas übel
K.: aber des neue is ja jetzt so sche do dean de Weiberleut glei gornimma aussageh bloß eine bieseln soid ma hoit net weil des im Woid vui schena geht
S: ja und des kompostiert angeblich so guat grod dass ma koane Radieserl drin o-pflanzen duad und des wos übrigbleibt - des is so gsund des muaß ma mit obanehma - in an so an Sackerl fürn Hund
K.: jetzt dad mit bloß no intressiern wos werdn mitn dem oidn Scheißheisl passiern mit dera genialen Wasserspülung - des war fei net schlecht bloß bläd hoit, dass da Nachbar unsern Scheiße net mächt
S.: da Wolfgang - unser Hüttenwart hätt ja scho Pläne a Brause kannt ma neibaun - a recht a schene und s`warme Wasser kannt de Sonna macha so wia des Liacht - des is fei net zum lacha
K.: jeder lasst überoin ds Liacht oiwei brenna früher hots eana gornet dunkel gnua sei kenna heit jeder de volle Festbeleuchtung nimmt ja weils hoit koa Ahnung habn, wo da Strom herkimmt
S.: des müassatns hoit googln in eanan Wischkastlphon aber do herobn deans gottseidank koa gscheids Netz net hobn drum brennt des Liacht oiwei Nächtelang weils moanan wenns hell is, habns an bessern Empfang
K.: von wegen Liacht aufgeh - do foid ma ei wias bei mir herunten den neian Ofa bauns ei hot eana da Daga - do oide Hüttenwart zwoa Stund lang erklärt wia des warme Wasser ausm Grandl aussado werd
S.: ja - und auffülln muaß mas mitn Schlauch - aber des is ganz gfeit weil wenn des Grandl übergeht - de ganze Hüttn dafeit oiso muaß ma beim voimacha dabeisteh - ollawei sonst gibt des eine riesen Sauerei
K.: und agratt er duad ois erster net aufpassen und hot des Grandl übergeh lassen 15 Mann dean mit de Putzlumpen starten auf den Entschuldigungsschnaps dean ma heit no warten
S.: ja der Ofa - warm macha dad er ja schon aber do kimmt de moderne Kastl-Wischer-Generation und drahd an irgendwelche Knöpf ummanand weils moanan, dass ma so per Internet a Wärm griang kannt
K.: aber sie habn hoit doch a moi wos vom eihoazen ghört worauf des Ofarohr mit Hoiz voigmacht werd und a des Grandl - aber es hot nix funktioniert und do brauchts gornet lacha, des is tatsächlich scho passiert
S.: aber oans muaß ma a song - wenns zum Hüttendienst is dann kemman gnua Leut zum arban des is gwiß und machan Hoiz - do duad se da Hüttenwart gfrein wenns a diam an Nachbarn sein Baam umschnein
K.: oana woid sein Bruada a moi mit zum Arbatsdienst nehma der is bisher no nia auf d`Hütten kemma und hot eam den kürzesten Weg - über Benediktbeuern erklärt i woaß net, wos aus dera Verwandtschaft no werd
S.: woaß das` no, vor a sechzg -ziebzg Johr wos do auf da Nocht oft da Deife los war de ganz Jungmannschaft - an Ossi is am besten gleng fungiern ois Entertainer, do is heit da Silbereisen a Dreck dageng
K.: do san hoit olle im Kreis rum gsessen do braucht ma koan Fernsehn des kost vagessen beim Pfeifferl- oder beim "14er" Spui oder beim Hypnotisiern do lach ma net fui
S.: bis um Zehne habns mit de Kinder a mords Gaudi ghabbt gsunga und gspuit bis eana de Aungdeckel san obaklappt de gräßern Deandl müassen de Kloana dann ins Bett nauf schaffa bis noch ana Stund de Kloan wieder kemma und song, dass de Großen jetzt schlaffa
K.: aber dann is erst aufganga - wenns Kindsvolk schlaft de internationale Längental-Fingerhackl-Moastaschafft oder Wahnsinns-Mensch-ärgere-dich-nicht-Turniere ohne Sieger bis in da Früha um viere
S.: do hot koa Sau a Smartphon braucht do hot ma sogor in da Hütten no graucht oiso besser is des auf jeden Fall fürn Gstank und Ruaß dass des Rauchergschwerl vor d`Hütten naus muaß
K.: und dann doch a moi de Bett-geherei so mancher schliaft net in sein eignen hergrichtn Bettbezug nei auf jeden Fall hot ma auf unserer Hütten scho mitn Schlafsock gschlaffa des duad da große Alpenverein erst zehn Johr später schaffa
S.: bei reichhaltigem Besuch ruckt ma zum Löfferlschlaffa zamma sonst kannt ma net olle zu mir auffe rama und umdrahd bloß auf Kommando werd bloß ab und zu hots oana net ghört
K.: weil der gschnarcht hot wie ein Elefant den hot ma dann zur Strafe zui mir in d`Küch obe verbannt und des warn dann aggrat de Nervensägen de mit Kochtopfdeckeln in da früha um siebe durchn Schlafraum fegen
S.: oder mit da Motarsag an Probelauf macha d`Hauptsach es is laut und duad sauba kracha und lautstark frühstücken um hoibe achte in da Früha i glab - i hob a Loch im Knia
K.: segts Leut - sowos gibts bloß auf da Hütten drum dan ma eich hoit olle bitten passts auf auf unser Goldstück - des is mehra ois a Haus so mancher lodt do sei Herz herobn aus
S.: und suacht sei Ruha und suacht sei Mitten wo findts sowos eher - ois wia auf da Hütten a Eck zum Traama - der Spruch duad passen a Ort zum Seele baumeln lassen
K.: drum hegt ses und pflegt ses und passts drauf auf und geht's mit Hirn und Herz auf unser Hütten nauf Extremsport lasst se do herobn natürlich net so betreibn aber do dean ja de restlichen Alpen ois Fun-Park dazua bleibn
S.: denn oa Fleckerl soids hoit scho no gebn ohne Risk and Fun und Busines-Leben ohne IT und Face-Book und co des brauch ma ois net -
S und K.: und des macht uns froh --- Pfüad eich